Abu Noor

كوفينتري بليتز

تقييم هذا المقال

on 20-06-2010 at 11:19 PM (1557 المشاهدات)

المشاركة الأصلية كتبت بواسطة Abu Noor

يوم الاثنين اللي فات قابلت سيدة اسمها فرانسيس صديقة للعائلة عمرها تجاوز ال80 سنة و سيدة ليدي من الهوانم بتوع زمان بجد و عندها ذاكرة حادة جدا... فسألتها يا فران تفتكري الحرب العالمية...

و نادر جدا لما تلاقي حد من الجيل اللي حضر فعلا الحرب العالمية لأن كلهم ماتوا او شيوخ ذاكرتهم ضعفت فكانت فرصة ممتازة اسمع عن الحرب من شاهدة للحدث و كل الاجيال الموجودة حاليا سمعوا عنها أو شاهدوها في الأفلام أو قرأو عنها في كتب...

المهم الست قالت لي طبعا فاكرة و ان عمرها كان حوالي 10 سنوات و كانت أخت كبري بين خمس اخوات ولدين و 3 بنات و انها من سكان مدينة كوفينتري منذ الميلاد الي الان و اد ايه الاحداث و التغييرات اللي حصلت في المدينة خلال حياتها... و حكت لي تفاصيل عن الغارات و انها و اخواتها كانوا بيخرجوا يلعبوا في مخلفات الحرب و يلموا القنابل و المتفجرات اللي اسقطتها الطائرات الألمانية... و ان المدينة ابيدت عن بكرة ابيها و كانت الحياة ببطاقات تموينية... و كانت دردشة ممتعة و اكتشفت ان كل المباني و المدارس و المستشفيات المعروفة في المدينة كانت حقول و فيها قواعد عسكرية بريطانية و مضادات طائرات أمريكية... و انها كان اول مره سكان المدينة يشوفوا رجال لونهم اسود و هم الجنود الأمريكان...

قصص رائعة سمعتها و حظي حلو اني قابلت واحدة من الجيل ده ... و لقيتها إمبارح بتتصل بأم نور و قالت لها انها لقيت كتاب نادر عن الحرب اصدرتة جريدة الويست ميدلاند تيليجراف اللي كانت اتدمرت هي الأخري في يوم 14/11/1940 و لكن التدمير ما وقفهومش عن طباعة اي عدد و طبعوا الجريدة في مدن أخري...

و بعتت لي الكتاب النهاردة و ماقدرتش اسيبه الا لما خلصته و روعة الكتاب ده ان في صور نادرة جدا عن المدينة خلال الحرب و انا شخصيا بعتبره اعجاز اللي عملوه الأنجليز في اعادة بناء بلد هاتشوفوا صورها كانت عاملة ازاي في زمن قياسي...

عملت سكان للكتاب و اتفرجوا علي هذا الكتاب النادر.